Lì, comod in poltròna, mì ier sera
denanz al vècc e bon televisor,
sigher toscan, birretta in la giazzera,
in santa pas me son passaa tre or.

Ai vòtt e mezza giust l'è cominciaa
on programa tranquill e distensiv:
nè porcad, nè cazzòtt, nè mòrt sparaa
nè barch caregh de profugh abusiv...

Nè cantant che te fann el "revival"
con canzon tirà giò del spazzacà:
minga ballètt o reclam del Viakal
del ciccolatt, del whisky o della "Ka"...

Minga de quiz e minga de Omnitel
nè acqua "per vess bell foeura e de denter",
no pòlitegh, giavan e magatell,
nè rimedi per dolor de venter...

D'accòrd: ona sorpresa, ona eccezion,
Ma domandemel nò che canal l'era:
l'era smorzada, la television
(me son leggiuu on bell liber, mì, jer sera)