El guantin de ras
La soa manina in d'on guantin de ras
infilada sòtt brasc al sò papà,
la par on gilli fresch, penna cattaa
'na carezza de nev, sul vestii scur,
Le streng e poeu le lassa,
e poeu le streng anmò
quell brasc fort e sicur
che l'ha vuttada a cress
e adess, on pass dree l'alter
le compagna a l'Altar...
la par ona vision, Dio se l'è bella!
...................................
La marcia l'è fenida
e la manina col guantin de ras
dal brasc del sò papà la s'è sfilada.
Ghe vann adree i sò oeucc.
ghe andarà dree el sò coeur
semper, su quella strada
che le spetta, taccada a on alter brasc.