La poveretta de le gesa

(maggetta milanesa)

Quell fagottell de strasc, taccaa a l'altar

de Sant Antonni, l'è la poveretta

de la gèsa. On casett di pussee rar:

padronna di lumitt, de la cassetta,

di scagn, di banch e di confessionari;

e anca di prèt... on esser legendari.

Nanca averta la gesa, on quaj lingera,

che l'è staa tutta nott a la serenna,

el se insacca su on banch... ghe par no vera

de fà 'l sognett, poggiand al legn la s' cenna ;

ma lee le secudiss: . Oh! quanti stori!

L'è ca' de Dio e minga on dormitori.

Se gh'è 'na creatura, che la prega,

ingenuggiada in terra, el so mestee

l'è de piccagh vesinna ona cadrega,

de faghela sentì suj piant di pee;

poeu de giragh in gir... dès ghej del scagn,

trenta per el lumin... l'è 'l so guadagn.

Tutta l'abilitaa l'è 'l tegnì d'oeucc

la clientella, che la fa per lee.

Tra quij in pee e quij, che gh'è in genoeucc,

la sa destingu i coeur in tribulee

e, come ona sciguetta, je tira, je tira,

fin ch 'han mollaa 'l franchett per la candira.

La dovariss tegnì la gesa netta,

fà semper giò la polvera di banch,

ma quella le fa giò quij, che se setta

e che va via cont i pagn tutt bianch,

perchè, se la g'ha 'l temp de fà nagott,

la corr a fà andà in bestia el ceregott.

E allora, no se scherza!... paroll gross,

che tocca tutti: cugitor, prevost;

e ghe se sgonfia tutt i venn del goss.

Lor riden e ghe dan del grass de rost

e lee la fa la vitima, l' ofesa...

L'è inscì la poveretta de la gesa.