|
On curaa el cunta-sù...
Me l'ha cuntada-sù on curaa de campagna.
La guerra fra i dònn del paes e el sò curaa la comincia prima che se
conossen. Semm ancamò in del '800, cala domà on para d'ann a la fin del
secol.
El vecc curaa l'è mòrt e i capp famiglia, come se usava ona volta, gh'hann
el diritto de cattà foeura el "novell pastor" fra ona terna de nòmm
segnalaa de la Curia.
In paes s'ciòppa ona vera "battaglia elettorale".
I pussee infolarmaa hinn i dònn: catten-sù tutti i informazion possibil
su i trii pret e se procuren anca i fotografii.
In di cà gh'è tutt on gasaghee de ciaccer e i dònn se metten d'accòrd,
ghe disen ai marì: « Cattè pur foeura quell che vorii, ma minga el don
Malachia ».
« Ma perché? » « Perché nò! Perché l'è brutt e zòpp.»
Per amor de la pas in famiglia, i marì fann citto, ma quand se tratta de
votà, salta foeura pròppi el nòmm del don Malachia. Hann vorsuu fagh on
dispresi ai miee e, siccome la votazion l'è segretta, pòden stoppagh la
bocca ai dònn che reclamen.
La scelta di capp famiglia l'è pròppi bòna: el curaa l'è on curaa in
gamba, pien de voeuja de fà e, per prima ròbba, el riess a mettegh in del
coo
a la soa gent che bisògna fà-sù ona gesa noeuva.
El paes l'è piscinin, domà ona cinquantèna de famili, ma paes de passagg,
con tanto moviment de carròzz e de forestee. Ghe voeur ona gesa pussee
granda.
« El fa facil tusscòss » disen i dònn, ma lù, el curaa, el se rend cunt
che domà cont i danee del paes la saria ona ròbba tròppa longa... Allora
'se 'l fa? Tutti i mattinn el va a la fermada di carròzz e di òmnibus a
cavall e el ghe domanda ai viaggiador ona limosina per la gesa noeuva.
Pòcch a pòcch el tira-sù on poo minga mal de danee.
On dì el troeuva on forestee, on mezz
antecrist, ch'el ghe sent nò de sta oreggia; el curaa l'insist e quell
el sacramenta: « Ma guarda che razza de pret che gh'ha de vegnimm in di
pee a rompon i ball... ».
Per tajalla a la curta, el sbròtta foeura a dì: « Va ben, ghe doo cent
franch, minga per fà la gesa noeuva, ma per sbattela giò ».
El nòster curaa el fa mostra de nient: « Ciappi volentera la soa offerta,
el Signor le compensarà ».
El forestee le guarda stralunaa e poeu el mett in ciar: « Hoo dii che i
danee gh'je doo doma per sbatt giò la gesa ».
Don Malachia le ciappa per man e le ména doe hinn adree a fà la gesa noeuva:
« Ch'el guarda, denter gh'è ancamò i mur de la
veggia gesetta, cont i so danee pagaroo i operari che je sbattarann giò.
El forestee el resta senza fiaa, el curaa ghe l'ha fada sòtta i pee, ma
oramai el pò pù tirass indree.
Se dis che i duu sien diventà amison e gh'è chi i ha vist insèma a l'osteria denanz al biccer a cuntalla-sù.
Cont i danee cattaa-sù in paes e con quei di forestee, don Malachia el
fa la soa gesa. Ven a consacralla el Vescov, che on quai ann dòpo el ghe
da anca el prèmi per la pussee bella gesa noeuva dedìcada al Redentor.
I dònn del paes, a onta de l'attivitaa mai stracca del curaa, ghe
perdònnen
nò che pròppi con la soa elezion i marì ghe l'hann fada dì ai miee.
Anzi, cont el passà di ann, salta foeura on alter contrast.
El paes el s'è sviluppaa, dòpo la gesa hinn staa faa-sù cà e bottegh,
gh'è commercio, gh'è traffich, se tratta de tegnì bon i forestee... cont
i fest, cont el ball de carnevaa... e chi la moralitaa la passa in
seconda linea.
El curaa in gesa le fa buì, el parla de scandol, de vergògna, de dònn senza
creanza, de tosann senza modestia e, de domenega in domenega, el calca
giò la penna.
I dònn ghe la giuren: bisògna moccalla con sto pret moralista ch'el se
rend minga cunt de la realtaa e di interess del paes.
Te pòdet spettass de tutt di dònn che se inrabiss, te pòdet pù tegnii,
paren tanti diavol. De fatt fann on consili e deciden de "impiccà" el
curaa.
De front a la gesa gh'è ona veggia pianta che la par fada appòsta. Ona
sera che i marì hinn tucc a l'osteria a festeggià on anniversari, i
donn se troeuven denanz a la canònega; voeuna la pòrta la scala, voeuna la còrda,
on'altra on poporòtt vestii de prèt. In des minutt tutt l'è faa.
La mattina dòpo don Malachia el se ved "impiccato in effigie" denanz a cà soa.
Bei temp eren quii là che se podeva impiccà on pret senza dazzi, domàò
perché el ghe barbottava adree ai dònn che balla, ma i bei temp finissen
prest.
La guerra, i fioeu che vann e che torna pù indree... el impienì el
pairoeu, i dover de rispetta. Se pensa pù al carnevaa, ai fest, ai
forestee: bisògna pensà a la famiglia, al laorà, a mett-sù el caldar...
Don Malachia l'è restaa curaa per minga mal de ann fina a quand el Signor
l'ha ciamaa là.
I miee del dì d'incoeu che staghen pur quiett: el Concordaa fra Stato e
Gesa l'ha
cambiaa i cart in tavola, i mari pòden pù nominà nissun curaa. |
|
|
