Logica (Oreste Jannelli)                            

Logica
 
 Se tucc el se trasforma
 e nient el se distrug
 mì stoo semper chì
 
 Se tucc a la soa fin
 el torna al sò principi
 mì sont al traguard
 
 Se tucc el gh'ha on destin
 che'l ghe traccia la vita
 mì gh'hoo nient de fà
 
 Se tucc vann a memoria
 e troeuven el sò temp
 mì perdi dree a cercà
 
 Se l'union fa la forza,
 sia come 'l se sia,
 mi stoo depermì
 
 Se'l fin giustifica ogni mezz,
 la vaga 'me la voeur,
 mì resti indree al princippi.
 
 
 Logica II
 
 S'el bell l'è minga bell
 ma quell che pias
 mì me sont ilus
 
 Se gh'è minga duu
 senza trii
 chi gh'è troppa confusion
 
 S'el lavorà
 nobilitass
 mì saria on re
 
 Se chi va pian
 el va lontan
 mi son già stracch
 
 Se'l problèma l'è
 el vess o l'avè
 mì son senza
 
 Se'l dubbi l'è
 vess o no vess
 mì seri ona volta.