L'arca

On bel dì de brutt temp,
aria de funeral,
se sent de là de i nivol ona vos:
"razza de lazzaron,
attent che chichinscì la marca mal!
Gent senza coeur e senza religion,
robalizzi, ciollad, imbroj a brent,
sciambol e mazzament de no cuntaj,
leccardarij e vizi sporscellent...
Adess ve la doo mì la sopressada
che l'è vegnuu el moment da dagh on taj".

In del scoltà sto fior d'intemerada
Noè che l'era in l'ort a pientà i verz
l'alza la testa e el ved
el gran Javè in personna: "Riverissi,
- el ghe dis - se succed?"
E Lù: "Ve condanni a on supplizi
che ve regordaree per on bel pezz:
mandaroo giò a seggion
tant'acqua de quattà tutt i montagn,
no restarà pù on omm de quej che gh'era,
che l'è giust che i vonscion faghen el bagn.
El mond el sarà quiett 'me ona risera:
acqua e silenzi, tomba di peccaa".

E intanta ch'el Noè "Bondì fasoeu"
el pensa, Lù el repia: "Stremisset no,
che questa no l'è anmò la fin del mond.
Te set on bravo fioeu
e te condanni a viv: a sù on barcon
tutt a compart e col sò bravo tecc,
ma bell gross e bel fond,
pitturaa dent e foeura col catramm.
Te ciappet la miee col Semm e 'l Camm,
l'alter fioeu pussee smort,
i donn che gh'hann insemma,
e denter tucc. Ma attent, voeuri salvà
anca i besti del mond senza esclusion...
Donca, dent anca lor, che mì de intort
ne foo minga e lor gh'entren propi nient...
Allora, a l'opra!"

                        El tas L'onipotent
e subet el Noè el se mett in truscia.
Taja, liga, martella, impociacca,
la baracca in d'on boff l'è pronta lì.
Ghe metten denter robba de mangià
(che per bev hinn a post), poeu tutt in còr
se metten a sbragià: "Besti, vegnì!"

E comincia ona longa procession
de besti in bella mostra pellegrina:
in testa a tucc soa maestaa el leon,
poeu conili, giraff, pegor, camej;
riva el struzz, l'elefant, riva i porscej,
riva el loff con la volp, riva el foin;
i fioeu ciamen el gall con la gajna,
che ghe piaseva i oeuv in cereghin.
Poeu de guardia e de caccia tutti i can,
coi sò pures, coi pioeucc e coi bordocch,
cavaj gris e roan,
tòr con la vacca, dromedari, occh;
ona brancada d'avi in l'alvear
e cont i onor che merita on sultan
l'asen... - no ghe toccas a l'omm doman,
che Dio ne guarda! on mond senza somar.

Ghe semm tucc? Ma no che manca el gatt!
El gh'è minga... Ma in dove el s'è casciaa
sto malnatt? Cerchel chì, ciammel de là,
dal tecc ven giò on riciamm de birignao
e duu smerald con aria de baloss
sbarlusissen in l'ombra quasi a dì:
guardee che mì son minga on ciribira.
L'era là de trii dì con la coa drizza
sto malnatt margniffon
ch'el spettava tranquill come on trelira.
Poeu ven el turno de ciamà i usej
e se sta no a perd temp in menudraj,
el ziffola Noè e o brutt o bej
chi riva riva. "Quanto ai pess - el dis -
se rangiarann, me metti no in fastidi,
ch'el diluvi per lor l'è on paradis".

Se sara sù la porta e tacca a pioeuv,
se solleva la barca, adasi adasi
la va... E passa i dì, passen i nott,
baja i can, la gajna la fa l'oeuv,
e intanta foeura pioeuv, e pioeuv, e pioeuv...

Dopo quaranta dì de temporal,
che tutti ghe n'aveven i mincion
schisciaa, ven foeura ona sperlada
de sô, l'acqua la cala, el pivion
che l'era a fà on girett
el torna indree cont on ramett d'oliv.
"Tas, tas, che l'è finida, - vosen tucc -
l'è passaa l'oragan, se torna a viv".
E lì se sent la barca taccà dent
in quajcoss e poeu fermass de bott.
El va sul tecc el gatt,
el se guarda d'intorna e poeu el dichiara:
"Mì el conossi, quest chì l'è l'Ararat".

I besti vegnen foeura, disen grazie
e vann per i fatt sò. Pensos el resta
el Patriarca, on poo per el destin
de l'omm e on poo ch'el voraria fà festa:
on brindes...ma con cosa? e lì per lì
el decid che con l'uga se fa el vin.
Pientà i vidor l'è staa ona stupidada
e no ve disi poeu sott ai topiett
quanti ciòcch che l'ha ciappaa lù coi nevod;
e st'anema de ciócch l'hann travasada
ai fioeu che gh'è nassuu da i sò semenz,
inscì bon e con tanti pocch difett
che anmò adess se ne ved i conseguenz.

a brént         profusione (la "brenta" è una misura di capacità e vale 50 litri)
ciòcch           sbornie (con l'accento grave si pronuncia con la "o" aperta)
ciócch           ubriaco ( con l'accento acuto si pronuncia come la "u")
ciollàd           buscherature, truffe
ciribìra          è un tipo di cardellino, ma designa, come il merlo, persone
                     di poco giudizio
oeúv in cereghín         uova al tegame ("cereghin" traduce: chierichetto. Il
                                    termine viene applicato alle uova, in quanto, una
                                    volta fritte, assomigliano alla "chierica" dei frati)
sciámbol                     orge (ma normalmente "fà sciambola" si usa in
                                   senso bonario, col significato di "fare baldoria")
smòrt                          pallido, riferito a Jafet, terzo figlio di Noè, che darà
                                   origine alla razza ariana
sopressàda                  punizione (alla lettera "un colpo di ferro da stiro")
trànquill cóme on tre lìra  perché la moneta da tre lire, equivalente a
                                   mezzo scudo milanese, portava impresso da un lato
                                   un viso sorridente
vonsción                     persona sporca

(tratto da Stori liber del Gran Liber"